Oog sonder lede

’n Gevriesde hond
hang in die slaghuis
vermom soos ’n skaap
en loer
deur die venster
waar voetgangers
soos worsies vir ete hom aangaap

Die afkopbees
kerf haasvleis fyn tot blokkies
soek sy hoed en kloutjies
gryp sy tong in pekelsout gedraai
maak sy ribbes bymekaar
vir t-bene in ’n ry vir die braai

Die hoender wink die katte nader
vir sy hart sy maag en lewer
kry sy stert gepluk en gat gestop
met origanum en jenewer
vou sy vlerke breed agter bors vernaam
knieë geamputeerd omhoog gebeur
eerste onder die rooster in vir ekstra geur

Maar die meester vat die prys:
op silwer skinkbord getooi
vriendelike tande skoon geskrop
snoet gekrap, bestrik, bekous
die vark se brein met die kop
en oë wat ewig staar
deur smaaklekker gladde sous

Joomla templates by a4joomla